Over weight and Diet habits,
అధిక బరువు వాస్తవాలు అలవాట్లు ,అధిక బరువు, ఊబకాయం, ఒబెసిటి, స్థూలకాయం.
Advise:
బరువు తగ్గితే ఆరోగ్యం:
ప్రస్తుతం ప్రపంచ వ్యాప్తంగా ఎంతోమంది అధిక బరువు, స్థూలకాయంతో సతమతమవుతున్నారు. సుమారు 120 కోట్ల మంది అధిక బరువుతో.. 30 కోట్ల మంది వూబకాయంతో బాధపడుతున్నారని అంచనా. వీరిలో 13 శాతం మంది, పిల్లలు యువకులే కావటం విశేషం. గత పదేళ్లతో పోలిస్తే ఇది రెట్టింపు కావటం మరింత ఆందోళన కలిగిస్తోంది. మన దేశంలో పట్టణాల్లో ఉన్నత, మధ్య తరగతి మహిళల్లో 30-50 శాతం మంది.. పురుషుల్లో 32 శాతం మంది స్థూలకాయంతో బాధపడుతున్నారని ఇటీవల జాతీయ పోషకాహార సంస్థ (ఎన్‌ఐఎన్‌) నిర్వహించిన సర్వేలో వెల్లడైంది. అధిక బరువు, స్థూలకాయం వివిధ జబ్బులకు దారితీస్తుండటంతో వీటిని తగ్గించుకోవాలని వైద్యులు నొక్కి చెబుతున్నారు. ప్రపంచ ఆరోగ్య సంస్థ ప్రకారం నివారించదగిన 10 ఆరోగ్య సమస్యల్లో స్థూలకాయం కూడా ఒకటి. ముఖ్యంగా స్థూలకాయుల సంఖ్య పెరిగిపోతుండటానికి టీవీలు, కంప్యూటర్ల ముందు ఎక్కువసేపు గడుపుతుండటం.. పిల్లలకు ఆటస్థలాలు కనుమరుగు అవుతుండటం.. వ్యాయామం చేయకపోవటం.. శారీరక శ్రమ అంతగా లేని ఉద్యోగాలు.. ఆహారంపై అవగాహన లేకుండా చిరుతిళ్లకు అలవాటు పడటం వంటి జీవనశైలి దోహదం చేస్తోంది.
మన సమాజంలో కేలరీలు అధికంగా ఉండే పిండి పదార్థాలు, వేపుళ్లు, నూనె, నెయ్యి, కొవ్వు పదార్థాల వాడకం ఒకప్పటికన్నా నేడు బాగా పెరిగిపోయింది. ఇలా ఎక్కువెక్కువగా తింటూ అవసరమైన మేరకు శారీరక శ్రమ చేయకపోవటం వల్ల శరీరంలో కొవ్వు పేరుకుపోయి బరువు పెరగటానికి దారి తీస్తోంది. దీనికి దురలవాట్లు కూడా తోడైతే పరిస్థితి మరింత విషమిస్తుంది.
వ్యాధుల దాడి:
స్థూలకాయం కారణంగా గుండె జబ్బులు, అధిక రక్తపోటు, మధుమేహం, సంతాన సమస్యలు, క్యాన్సర్‌, వూపిరితిత్తుల జబ్బులు, పిత్తాశయంలో, కిడ్నీల్లో రాళ్లు, అల్సర్లు, గ్యాస్ట్రిక్‌ సమస్యల వంటివన్నీ చుట్టుముడుతున్నాయి. భారీ కాయాన్ని మోయాల్సి రావటంతో మోకాలి కీళ్లు అరిగే ప్రమాదమూ ఉంది. కాలేయం దెబ్బతింటుంది. ఇన్స్‌లిన్‌ రెసిస్టెన్స్‌ పెరుగుతుంది. దీంతో మధుమేహ నియంత్రణ కష్టమవుతుంది. చెడ్డ కొలెస్ట్రాల్‌ (ఎల్‌డీఎల్‌) పెరిగి, మంచి కొలెస్ట్రాల్‌ (హెచ్‌డీఎల్‌) తగ్గుతుంది. ఇవి పక్షవాతానికి, గుండెజబ్బులకు దారితీస్తాయి. మనం కిలో బరువు పెరిగితే రోజుకి అదనంగా 30 కిలోమీటర్ల దూరం వరకు రక్తాన్ని నెట్టాల్సిన భారం గుండెపై పడుతుంది. దీంతో గుండె ఎక్కువ బలంతో పని చేస్తూ గుండె వైఫల్యానికి దారి తీస్తుంది.
బరువెందుకు పెరుగుతారు?
* ఏ వయసులోనైనా బరువు పెరిగే అవకాశం ఉన్నప్పటికీ.. చాలామంది మధ్యవయసులోనే ఎక్కువగా బరువు పెరుగుతుంటారు. కొందరు చిన్నతనంతోనే అధిక బరువుతో ఉండొచ్చు.
* కొందరు వంశపారంపర్యంగా అధిక బరువు సమస్య బారిన పడొచ్చు. తల్లిదండ్రుల్లో ఇద్దరూ స్థూలకాయులైతే సుమారు 73 శాతం మంది పిల్లలకూ అది రావొచ్చు. ఎవరో ఒకరు స్థూలకాయులైతే పిల్లల్లో 45 శాతం మంది దీని బారినపడొచ్చు.
* స్త్రీలల్లో కొన్ని గ్రంథుల స్రావాలు అధిక బరువును తెచ్చిపెట్టొచ్చు. రజస్వల అయినపుడు, గర్భం ధరించినపుడు, ముట్లుడిగిన తర్వాత మహిళలు అధికంగా బరువు పెరిగే అవకాశం ఉంటుంది. స్టిరాయిడ్లు, గర్భ నిరోధకమాత్రలు, ఇన్స్‌లిన్‌ వంటివి తీసుకోవటమూ దీనికి దోహదం చేయొచ్చు. మానసిక అలసట, అశాంతి, సరైన సమయంలో ఆహారం తీసుకోకపోవటం, స్వీట్లు ఎక్కువగా తినటం, వంటివన్నీ బరువు పెరగటానికి కారణమవుతున్నాయి.
మూడు రకాలు:
ఎత్తును బట్టి ఉండాల్సిన బరువును మూడు రకాలుగా విభజించారు.
1. సామాన్య బరువు
2. అధిక బరువు
3. వూబకాయం.
ఎత్తు బరువుల నిష్పత్తి (బాడీ మాస్‌ ఇండెక్స్‌-బీఎంఐ) ప్రకారం దీనిని గణించొచ్చు. బీఎంఐ 20-25 ఉంటే సాధారణ బరువుతో ఉన్నట్టు. 25-30 ఉంటే అధికబరువుగానూ 30-35 ఉంటే వూబకాయంగానూ పరిగణిస్తారు.
వ్యాధిగ్రస్థ వూబకాయం:
బీఎంఐ 40కి పైగా ఉంటే వ్యాధిగ్రస్థ వూబకాయం (మార్బిడ్‌ ఒబేసిటీ)లోకి అడుగిడినట్టే. ఈ దశలో నడవటమే కష్టమవుతుంది. ఏమాత్రం వ్యాయామం చేయలేరు. కష్టపడి వ్యాయామం చేసేందుకు ప్రయత్నించినా, తిండి తగ్గించినా కూడా బరువు తగ్గటమన్నది మాత్రం దుర్లభంగా తయారవుతుంది.
తగ్గే మార్గాలు:
* వ్యాయామం: సహజసిద్ధంగా బరువును తగ్గించుకోవటానికి వ్యాయామాన్ని మించింది లేదు. దీంతో శరీరాకృతిని కూడా తీర్చిదిద్దుకోవచ్చు. తలనొప్పి, నడుంనొప్పి, ఆందోళన వంటి సమస్యలూ తగ్గిపోతాయి. వయసు పైబడుతున్నా వ్యాయామాన్ని మానరాదు. వయసుకు తగ్గ వ్యాయామాలను ఎంచుకోవాలి.
* ఆహారం: వ్యాయామం చేయటంతో పాటు జీవన విధానాన్ని మార్చుకోవటమూ అవసరమే. ఇందులో ఆహార నియమాలు, మితం పాటించటం ముఖ్యమైనవి. ముఖ్యంగా కొవ్వులు, నూనె పదార్థాలను తగ్గించి సమతులాహారం తీసుకోవటంపై దృష్టి పెట్టాలి.
* ధూమానికి దూరం: అప్పుడుప్పుడు సిగరెట్లు, బీడీలు కాల్చితే అంతగా ముప్పు ఉండదని భావిస్తుంటారు. కానీ ఇది నిజం కాదు. వీటిల్లోని నికోటిన్‌ గుండె, శ్వాసకోశం, ఇతర కండరాలకు ప్రమాదం తెచ్చిపెడుతుంది. ఏమాత్రం పొగ తాగినా ఆరోగ్యానికి హాని కలుగుతుందని ఎన్నో అధ్యయనాల్లో రుజువైంది. పొగ తాగటం వల్ల రక్తంలో ఆక్సిజన్‌ మోతాదు పడిపోయి రకరకాల సమస్యలకు దారి తీస్తుంది. ఒకవేళ పొగ అలవాటుంటే వ్యాయామానికి అరగంట ముందూ తర్వాతా తాగకుండా ఉండటం మంచిది.
* ఆరోగ్యకరమైన జీవనశైలిని చిన్నప్పట్నుంచి పాటిస్తుంటే స్థూలకాయం ముప్పు నుంచి తప్పించుకోవచ్చు.
బేరియాట్రిక్‌ సర్జరీ:
వూబకాయం ప్రమాదకర స్థాయికి (మార్బిడ్‌ ఒబేసిటీ) చేరినవారు బరువు తగ్గాలంటే ‘బేరియాట్రిక్‌ సర్జరీ’ సమర్థ మార్గం. ఆహారాన్ని తగ్గించి వ్యాయామం చేస్తున్నా బరువు తగ్గనివారు, అధిక బరువు మూలంగా దైనందిన కార్యక్రమాలు చేయలేకపోతున్న వారికీ ఈ సర్జరీ మేలు చేస్తుంది. దీని ద్వారా తీసుకునే ఆహార పరిమాణం గణనీయంగా తగ్గుతుంది. ఇది బరువు తగ్గటానికి దోహదం చేస్తుంది. బేరియాట్రిక్‌ సర్జరీలో వివిధ రకాలున్నాయి. సాధారణంగా మనం తిన్న ఆహారం జీర్ణాశయం, పేగుల మొదటి భాగాల్లో జీర్ణమవుతుంది. అనంతరం చిన్నపేగుల గోడల ద్వారా పోషకాలు రక్తంలో కలుస్తాయి. మిగిలిన వ్యర్థాలు పెద్దపేగు ద్వారా బయటకు వెళ్తాయి. బేరియాట్రిక్‌ సర్జరీలో జీర్ణాశయంలో కొంతభాగాన్ని బాండ్‌తో బిగిస్తారు. దీనిని ‘గ్యాస్ట్రిక్‌ బ్యాండింగ్‌’ అంటారు. దీంతో జీర్ణాశయం సైజు తగ్గి ఆహారం తీసుకోవటం తగ్గిపోతుంది. ఇక చిన్నపేగుల బైపాస్‌ సర్జరీ ప్రక్రియలో పేగుల పొడవును తగ్గిస్తారు. దీని వల్ల ఆకలి తగ్గి క్రమంగా బరువు తగ్గుతారు.
* బేరియాట్రిక్‌ సర్జరీలో పొట్ట సైజును తగ్గించినంత మాత్రాన ఆకలి, తినాలనే కోరిక ఎలా తగ్గుతుందని చాలామంది అనుమానిస్తుంటారు. ఈ శస్త్రచికిత్స చేయించుకున్నవారిలో జీర్ణాశయానికి తగినట్టుగానే హార్మోన్ల ఉత్పత్తిలోనూ మార్పులు వస్తాయి. దీంతో ఎక్కువగా తినాలనే కోరిక కలగదు. వీటిని చేయించుకున్నవారిలో కొద్దిపాటి గ్యాస్ట్రిక్‌ సమస్యలు ఎదురవ్వొచ్చు. వైద్యుల పర్యవేక్షణలో మందులు వాడుతూ వీటిని నివారించుకోవచ్చు.
ఇదీ బీఎంఐ.. ఎత్తు-బరువుల నిష్పత్తి:
* బరువును కేజీల్లో ఎంతుందో చూసుకోవాలి.
* అలాగే ఎత్తును మీటర్లలో కొలుచుకోవాలి.
* తర్వాత ఎత్తు సంఖ్యను తిరిగి అదే సంఖ్యతో గుణించి.. ఆ వచ్చిన సంఖ్యతో బరువును భాగించాలి.
* ఉదాహరణకు మీ బరువు 68 కేజీలు, ఎత్తు 1.6 మీటర్లు ఉందనుకోండి. అప్పుడు ఎత్తు-బరువుల నిష్పత్తి (బీఎంఐ) 68/1.6X1.6 = 26 అవుతుంది.
నడుము చుట్టుకొలత:
* స్త్రీలు 80 సెం.మీ. (31.6 అంగుళాలు), పురుషులు 90 సెం.మీ. (35.6 అంగుళాలు) మించి నడుం కొలత పెరగకుండా చూసుకోవాలి.
* బీఎంఐ తక్కువగా ఉండి, ఒక్క నడుము చుట్టుకొలత ఎక్కువున్నా వ్యాధుల ముప్పు పొంచి ఉంటుందని మరవరాదు.
అధిక బరువు... అలవాట్ల వాస్తవాలివి.
రోజు వారి ఆహారంలో ఏం తినాలి.. ఏం తినకూడదు. కార్బోహైడ్రేట్లు మంచివా.. చెడ్డవా? పాలు, పాలపదార్థాల గురించి కొంతమంది మంచివంటే మరికొందరు బరువు పెంచుతాయంటారు... ఏది నిజం తెలుసుకోవాలంటే పోషకాహార నిపుణులు చెబుతున్న వాస్తవాలు తెలుసుకోవాల్సిందే!
* అవాస్తవం: కార్బోహైడ్రేట్లు ఇన్సులిన్‌ నిరోధించి.. బరువు పెంచుతాయి
* వాస్తవం: బరువు పెరగడం అనేది ఫలానా పదార్థం వల్ల ఉంటుంది అని చెప్పలేం. అధిక కెలొరీలు స్వీకరించడం, అవి ఖర్చయ్యేలా వ్యాయామాలు చెయ్యకపోవడం వల్లే సాధారణంగా బరువు పెరుగుతారు. అలాగని బరువు పెరుగుతాం అన్న అభిప్రాయంతో కార్బోహైడ్రేట్లు తీసుకోకపోవడం మంచిది కాదు. దానివల్ల మన ఆహారంలో కాల్షియం, పీచు పదార్థాలు క్రమంగా తగ్గిపోతాయి. దాంతో ఆరోగ్యాన్నందించే ఫైటోకెమికల్స్‌ తగ్గుతాయి. బదులుగా అన్ని పోషకాలు అందించడానికి సప్లిమెంట్లను తీసుకొంటున్నాం కదా అనొచ్చు. కానీ అవి పోషకాల అందించే శక్తికి ప్రత్యామ్నాయం ఎంత మాత్రం కాదు అంటారు పోషకాహార నిపుణులు. కార్బోహైడ్రేట్లను తగు మోతాదులో తీసుకోవడం తప్పనిసరి.
* అవాస్తవం: సాయంత్రం ఏడింటికే భోజనం కానిచ్చేయాలి.
* వాస్తవం: సాయంత్రం ఎప్పుడు తిన్నా నిద్రించడానికి మూడు గంటలు ముందుగా భోజనం చేయాలి. ఒకవేళ మీ పనివేళలు ఇందుకు సహకరించకపోతే నూనెలు అధికంగా ఉన్నవాటిని నియంత్రించుకోవాలి. అవి కూడా ఆలస్యంగా తినడం శ్రేయస్కరం కాదు. తిన్న వెంటనే నిదురించడం ఎంత మాత్రం మంచిది కాదు. బరువు ఎక్కువయ్యే అవకాశము చాలా ఎక్కువ . తిన్నది జీర్ణం అయిన తర్వాతే నిద్రకు ఉపక్రమించండి.
* అవాస్తవం: పాలు, పాల ఉత్పత్తులు అధిక బరువుకు కారణం.
* వాస్తవం: పాలు సంపూర్ణ పోషకాహారం. ఇందులో సుమారు 14 రకాల ప్రధాన పోషకాలుంటాయి. ముఖ్యంగా మాంసకృత్తులు.. కాల్షియం ఉంటాయి. 'పాల నుంచి అందే కాల్షియం వృక్ష సంబంధిత ఉత్పత్తుల నుంచి అందే కాల్షియం కంటే త్వరగా శరీరానికి అందుతుంది. దీనిలో లినోలిక్‌ ఆమ్లం... కొవ్వును కరిగించడానికి ఉపకరిస్తుంది. బరువు తగ్గడానికి దోహదం చేస్తుంది.
* అవాస్తవం: ప్రొటీన్లను.. కార్బోహైడ్రేట్లను కలిపి స్వీకరించకూడదు. లేదా రెండు రకాల ప్రొటీన్లను ఒకేసారి తీసుకోకూడదు!
* వాస్తవం: ఒకే రకమైన ఆహారాన్ని తినడానికి శరీరం సహకరించదు. దాంతో తక్కువ తింటాం. కానీ దీని వల్ల శరీరానికి అన్ని రకాల పోషకాలు అందవు. అయితే దీని ఫలితాలు ఒక్కసారి కనిపించకపోయినా దీర్ఘకాలంలో అనేక వ్యాధులు వేధిస్తాయి. అందుకే సంక్లిష్ట కార్బోహైడ్రేట్లు ఉండే పొట్టుతీయని గోధుమలతో చేసిన రొట్టెలు, చిక్కుడి జాతి గింజలు, పప్పులు, గింజలు, మాంసపు ఉత్పత్తులు తినాలి. ఇవి కణాలను ఆరోగ్యంగా ఉంచుతాయి. బరువు తగ్గడానికి అన్ని తినాలి.. కానీ ఆ కెలొరీలను కరిగించడానికి తగిన వ్యాయామం కూడా అవసరమే అని గుర్తించుకోవాలి.
పాలు తాగితే బరువు తగ్గుతాం :
పాలు తాగితే బలం వస్తుందని తెలుసు కానీ.. బరువు తగ్గుతామని తెల్సా...? అవును అమెరికన్ జర్నల్ ఆఫ్ క్లినికల్ న్యూట్రిషన్ వారు రెండేళ్ల పాటు పాలు తాగిన వారిపై జరిపిన పరిశోధనలో ఈ నిజాలు వెల్లడించారు.
ఇజ్రాయిల్‌లోని బెన్-గురియాన్ కళాశాలకు చెందిన డానిత్ షహార్ నేతృత్వంలో నిర్వహించిన ఓ పరిశోధనలో ప్రతిరోజు రెండు గ్లాసుల పాలు తాగిన వారు ఆరు నెలల వ్యవధిలో అధిక మోతాదులో డి-విటమిన్‌ను పొందగలిగినట్లు గుర్తించారు.
ఈ పరిశోధనలో భాగంగా 40 నుంచి 65 ఏళ్ల వయస్సు గల 300లకు పైగా స్త్రీ, పురుషులపై రండేళ్ల పాటు జరిపిన పరిశోధనలో ఈ విషయాలను వెల్లడించారు. ప్రతి రోజు పాలు తాగే వారు, పాలు తాగని వారితో పోలిస్తే సగటున ఆరు కిలోల బరువు తగ్గినట్లు వారు తెలిపారు.
పాల పదార్థాలలో కాల్షియం అధికంగా ఉంటుంది. ప్రతి రోజు అధిక కాల్షియం ఉండే డైరీ పదార్థాలను తీసుకున్న వారు రెండేళ్ల తర్వాత సగటున ఆరు కిలోల బరువు తగ్గగా.. తక్కువ కాల్షియం ఉండే డైరీ పదార్థాలను తీసుకున్న వారు రెండేళ్ల తర్వాత సగటున 3.5 కిలో బరువు తగ్గినట్లు వారు గుర్తించారు.
సాధారణంగా రోజుకు రెండు గ్లాసుల పాలను తీసుకోవడం వల్ల శరీరానికి 583 మిల్లీ గ్రాముల కాల్షియం అందుతుంది. కాల్షియం వల్ల శరీరానికి విటమిన్-డి అందుతుంది. అంతేకాకుండా శరీరంలో విటమిన్-డి స్థాయి స్వతంత్రంగా బరువు తగ్గడానికి ఉపయయోగపడుతుంది.
పాలు, పాల ఉత్పత్తులు విటమిన్-డిను అందించడంలో కీలక పాత్ర పోషిస్తాయని తమ పరిశోధనలో వెల్లడైందని వారు తెలిపారు. సాధారణంగా ఒక రోజులో శరీరానికి 400 అంతర్జాతీయ యూనిట్స్(ఐయూ) విటమిన్-డి అవసరం అవుతుంది. అంటే దాదాపు నాలుగు గ్లాసుల "లో-ఫ్యాట్ మిల్క్" అన్నమాట.
కాబట్టి బరువు తగ్గడానికి బరువైన పనులు(ఎక్సర్‌ సైజులు)చేయడం మాని, ఎంచక్కా రెండు గ్లాసులు పాలు తాగితే చాలని వారు సూచిస్తున్నారు.
అధిక బరువు చాలామందిని వేధించే సమస్య. 'అలాంటివారు ఈ ఎనిమిది సూత్రాలూ పాటించండి, శ్రమలేకుండానే బరువు తగ్గిపోతారు' అంటున్నారు బ్రిటిష్‌ పోషకాహార నిపుణులు.
* బరువు తగ్గాలనుకునేవారు వారానికి ఒకరోజు అన్నిపూటలూ భోజనానికి బదులుగా కూరగాయలూ ఆకుకూరల సలాడ్‌ తీసుకుంటే ఫలితం ఉంటుంది. అంతేకాదు, ఆ పోషకాలూ విటమిన్లతో చర్మానికి నిగారింపూ పెరుగుతుంది.
* తగిన చోటు, సమయం చూసుకొని కూర్చొనే భోంచేయాలి. దాంతో ఆహారాన్ని బాగా నములుతారు. ఫలితంగా త్వరగా జీర్ణమవుతుంది.
* సాధ్యమైనంత చిన్నసైజు ప్లేటులో భోంచేస్తే మీకు తెలియకుండానే పూటకు కనీసం 250 క్యాలరీలైనా తగ్గించి తింటారు.
* నిద్రలేచిన గంటలోపే బ్రేక్‌ఫాస్ట్‌ పూర్తిచేయడం మంచిది. ఆలస్యంగా తినడంవల్ల రెండు భోజనాల మధ్య సమయం తగ్గి కొవ్వు పెరుగుతుంది.
* రోజూ పాల ఉత్పత్తులు ఎంతోకొంత పరిమాణంలో తీసుకోవాలి. వీటిలోని కాల్షియం కొవ్వుని కొంతమేరకు తగ్గించగలదు.
* వ్యాయామం చేసిన తర్వాత 30-60 నిమిషాల లోపు భోంచేయడం మేలు. కొత్తగా చేరే క్యాలరీలను శరీరం అలసిపోయినపుడు వెంటనే ఉపయోగించుకుంటుంది.
* భోజనానికి ముందు నారింజలాంటి నిమ్మజాతి పండు సగం తింటే బరువు తగ్గుతారని ఓ పరిశోధన.
* వారంలో మూడు రోజులు గుడ్లు, ఒకపూట చేప తినడం కూడా బరువు తగ్గించేందుకు ఉపయోగపడుతుంది.
అధిక బరువును తగ్గించుకునేందుకు అనేక మార్గాలు అందుబాటులో ఉన్నా.. అవగాహనాలేమితో చేసే పొరబాట్లతో మరింత బరువు పెరుగుతాం. వాస్తవాలు తెలుసుకుని సరైన నియమాలు పాటించగలగాలి.
అల్పాహారం మానేస్తే సన్నగా మారిపోవడం చాలా సులువనుకుంటారు కొందరు. కానీ ప్రతిరోజూ అల్పాహారం తీసుకునేవారు త్వరగా చిక్కుతారని చెబుతోందో అధ్యయనం. అల్పాహారం తీసుకోవడం వల్ల మిగిలిన రోజులో ఆకలి తక్కువ కలుగుతుంది. దాంతో ఆహారాన్ని మితంగా తీసుకుంటాం. రోజంతా చురుగ్గానూ ఉండటం వల్ల శరీరానికీ వ్యాయామం అందుతుంది. జీవక్రియ ఆరోగ్యంగా మారుతుంది. ఇవన్నీ సన్నగా మారేలా చేస్తాయి. అయితే పోషకమిళితమైన పదార్థాలను ఎంచుకుంటేనే ఆ లాభాల్ని పొందవచ్చని చెబుతున్నారు నిపుణులు.
బరువు పెరగడమనేది కుటుంబచరిత్రలోనే ఉందని తేలిగ్గా తీసుకుంటారు కొందరు. కానీ మనసు పెడితే సన్నగా మారడం మీ చేతుల్లోనే ఉందని గ్రహించాలి. తీసుకునే కెలొరీలను గమనించుకుంటూ.. వాటిని ఖర్చుచేసేందుకు సరైన వ్యాయామం చేయాలి. శరీరానికి శక్తినందిస్తూ.. అదేసమయంలో తక్కువ కెలొరీలనిచ్చే పదార్థాలను తీసుకోవడం కూడా సులువుగా బరువు తగ్గగలుగుతాం.
అతి ఎప్పుడూ అనర్థమే అవుతుంది. సన్నగా మారే క్రమంలో మితిమీరి పాటించే కొన్ని నియమాల వల్ల లాభం కన్నా ఇతర సమస్యలు వచ్చే ఆస్కారం ఎక్కువగా ఉంటుంది. సమతులాహారానికి ప్రాధాన్యం ఇస్తూ బరువు తగ్గేందుకు ప్రయత్నించాలి. అతిగా వ్యాయామం చేయడం కూడా సరికాదు. రోజులో ఓ గంటన్నరకు మించి వ్యాయామం చేయకూడదు.
కొన్ని రకాల ప్రత్యేకమైన పదార్థాలు బరువును తగ్గించేలా చేస్తాయి. మిల్క్‌షేక్‌లు, చాక్లెట్లు, శరీరంలో కొవ్వును పెంచే సూప్‌లకు బదులుగా క్యాబేజీ సూప్‌డైట్‌, గ్రేప్‌ ఫ్రూట్‌డైట్‌ వంటి వాటిని ఎంచుకోవచ్చు. కానీ ఇలాంటి వాటిని ఎక్కువకాలం కొనసాగించలేం. ఖరీదెక్కువ కావడం, కోరుకున్న రుచినివ్వకపోవడం వంటి కారణాలతో ఇతర పదార్థాలనూ తీసుకోవడం మొదలుపెడతాం. అందుకే శరీరారనికి అవసరమైన పోషకాలందించే ఆహారాన్ని తీసుకుంటూనే మెరుపుతీగలా మారాలి.
బరువు తగ్గాలనుకునేవారు ముందుగా వేళపట్టున భోంచేయాలి. ప్రతి రెండుగంటలకోసారి కొద్దికొద్దిగా తినాలి. వేళపట్టున నిద్రపోవడం వల్ల కూడా స్థూలకాయం బాధించదని ఓ అధ్యయనం పేర్కొంటోంది. కాబట్టి రాత్రిళ్లు త్వరగా భోంచేసి రెండు గంటల తరవాత నిద్రపోవడాన్ని ఓ అలవాటుగా మార్చుకోవాలి.
ఒకేసారి ఎక్కువ మోతాదులో ఆహారం తీసుకోవడం కాకుండా కొంచెం కొంచెంగా ఎక్కువ సార్లు తినడం ఆరోగ్యానికి మంచిది. త్వరగా జీర్ణమవుతాయి. అధిక కొవ్వు నిల్వలు పేరుకోవు. బాగా నమిలి తినడం, మంచినీళ్లు ఎక్కువగా తాగడం, మిఠాయిలను మితంగా తినడం వంటి జాగ్రత్తలను పాటించడం ఎంతయినా మంచిది.
అధిక బరువు తెలివికి చేటు!
వూబకాయంతో వచ్చే రకరకాల చిక్కుల గురించి వింటూనే ఉన్నాం. గురక నుంచి గుండె జబ్బుల వరకూ దీనితో ఎన్నో సమస్యలు తలెత్తే అవకాశం ఉంది. అవే కాదు... ఊబకాయం వల్ల పిల్లల్లో విషయ గ్రహణ సామర్థ్యం కూడా దెబ్బతింటున్నట్టు తాజా అధ్యయనంలో గుర్తించారు. ముఖ్యంగా అధిక బరువు గల ప్రాథమిక పాఠశాల విద్యార్థుల్లో ఈ తేడా స్పష్టంగా కనబడుతున్నట్టు వీరు గమనించటం విశేషం. పిల్లల బరువు, నిద్ర సమస్యలు, తేలివి తేటలన్నీ ఒకదాంతో మరోటి ముడిపడి ఉన్నట్టు పరిశోధకులు గుర్తించారు. అధికబరువు గల పిల్లలు తగినంత నిద్రకు నోచుకోవటం లేదని.. ఇది తరగతిలో పాఠాలను నేర్చుకోవటంలో ఇబ్బందులకు కారణమవుతోందని తేలటం విశేషం. చికాగో ప్రికర్‌ స్కూల్‌ విశ్వవిద్యాలయానికి చెందిన కరెన్‌ స్ప్య్రూట్‌ ఇటీవల ఒక అధ్యయనం చేశారు. సగటున 8 సంవత్సరాల విద్యార్థులను ఎంచుకొని వారికి పాఠాలను నేర్చుకోవటం, జ్ఞాపకశక్తి, ప్రణాళికా రచన, సమస్యలను పరిష్కరించటం, ఏకాగ్రత వంటి తెలివి తేటలకు సంబంధించిన పరీక్షలు పెట్టారు. అలాగే రాత్రిపూట వాళ్లు నిద్రపోయే విధానాన్నీ పరీక్షించారు. ఈ అధ్యయనంలో ఆసక్తికర అంశాలు వెల్లడయ్యాయి.
* నిద్ర సరిగా పట్టని పిల్లలకు ఊబకాయం ముప్పు పెరగటమే కాదు తెలివి తేటల పరీక్షలో తక్కువ మార్కులు కూడా వచ్చాయి.
* వూబకాయ పిల్లల్లో నిద్ర సంబంధ శ్వాస సమస్యలు, విషయ గ్రహణ సామర్ధ్య లేమి వంటి ఇబ్బందులు పొంచి ఉంటున్నాయి.
* ఇక పాఠాలు నేర్చుకోవటంలో ఇబ్బంది పడుతున్న వారిలో ఊబకాయం, నిద్ర సమస్యలు కూడా కనిపిస్తున్నాయి.
వీటన్నింటినీ దృష్టిలో ఉంచుకుని చూస్తే- అధిక బరువు పిల్లల్లో నిద్ర సంబంధ శ్వాస సమస్యల వంటివాటిని నిర్లక్ష్యం చేయరాదని కరెన్‌ సూచిస్తున్నారు. తరగతిలో తక్కువ మార్కులు తెచ్చుకుంటున్న పిల్లల్లో తప్పనిసరిగా పట్టించుకోవాల్సిన అంశాల్లో నిద్ర కూడా ఒకటని నిపుణుల అభిప్రాయం. దీనిపై మరింత లోతుగా పరిశోధనలు జరగాల్సిన అవసరముందని భావిస్తున్నారు.
వూబకాయంతో చిగుళ్ల సమస్య:
వూబకాయులు తరచూ చిగుళ్ల సమస్యను సైతం ఎదుర్కొనాల్సి ఉంటుందని పరిశోధకులు హెచ్చరిస్తున్నారు. శరీరంలో అధిక కొవ్వు, స్థూలకాయం కారణంగా పలురకాల అనారోగ్య సమస్యలు తలెత్తుతాయనే విషయం ఇప్పటికే తెలిసిందే. వీటిలో గుండె జబ్బులు, మధుమేహం, నిద్ర రుగ్మతలు, ఎముకల బలహీనత వంటి సమస్యలన్నీ తలెత్తుతాయి. స్థూలకాయులు బ్యాక్టీరియా బారిన ఎక్కువగా పడుతుంటారనీ, ఫలితంగా చిగుళ్ల వ్యాధులు వస్తాయని బోస్టన్‌ యూనివర్సిటీలో చేపట్టిన తాజా అధ్యయనంలో గుర్తించారు.ఇటీవల చేపట్టిన అధ్యయనంలో.. ఊబకాయుల నోటిలో జింజివైటిస్‌ సమస్య తీవ్రంగా ఉంటుందనీ, వారిలో దంతాల ఎముకలు బాగా దెబ్బతింటాయని, ఇన్‌ఫెక్షన్‌ కూడా ఎక్కువేనని వెల్లడైంది. ఇన్‌ఫెక్షన్లపై పోరాడేందుకు రోగ నిరోధక వ్యవస్థ విడుదల చేసే రసాయనాలు కూడా వూబకాయుల్లో తక్కువేనని గుర్తించారు.
Half an hour for health, ఆరోగ్యానికో అరగంట:
సన్నగా నాజూగ్గా ఉన్నవారిని చూసి, తమ శరీరతత్వంతో పోల్చి చూసుకుని బాధపడటం వల్ల ఎటువంటి ప్రయోజనం లేదు. దానికి బదులు వారు పాటిస్తున్న ఆరోగ్య నియమాలను తెలుసుకుని ఆచరిస్తే మంచిది. భోజనం మానేస్తే బరువు తగ్గొచ్చు అనుకోవడం, బరువులెత్తే వ్యాయామాలు చేయడం వల్ల సన్నబడతాం అన్నది అపోహ మాత్రమే. తగినంత ఆహారం తీసుకున్నప్పుడే శరీరానికి కావాల్సిన శక్తి అందుతుంది. అయితే ఎక్కువ కెలొరీలు ఉండే జంక్‌ఫుడ్‌కి దూరంగా ఉండాలి. పోషకాలూ, పీచూ, నీటి శాతం ఎక్కువగా ఉండే ఆహారాన్ని ఎక్కువగా తీసుకుంటే బరువు అదుపులో ఉంటుంది. నిర్ణీత సమయానికి భోంచేయడం, వేళకు పడుకోవడంతో పాటూ నడకా, పరుగూ, తోటపనీ వంటి వాటికి కొంత సమయం కేటాయించాలి. అది (సమయం)కనీసం అరగంట ఉంటే ఫలితం ఉంటుంది. మానసిక ఆందోళన కూడా అధిక బరువుకి కారణమని అధ్యయనాలు వెల్లడిస్తున్నాయి. ఎంత తీరిక లేకుండా ఉన్నా కనీసం కొంత సమయాన్ని మీ కోసం మీరు కేటాయించుకోండి. ఇది కొత్త ఉత్సాహాన్ని నింపుతుంది. బరువు తగ్గే దిశలో మీకు ఆత్మవిశ్వాసాన్ని అందిస్తుంది.
