గరుడాసనం : గరుడమంటే గద్ద అని అర్థం. పామును ఎత్తుకొని పోయే గద్ద ఆకారాన్ని పోలి వుండడం వల్ల దీనిని గరుడాసనం అంటారు. అలాగే కాళ్ళు చేతులు మెలి పెట్టి ఉండడం వల్ల దీనిని 'ఫణీంద్రాసనం' అని కూడా అంటారు. తీవ్ర మోకాళ్ళ సమస్యలున్నవాళ్ళు దీన్ని చేయకపోవడం మంచిది.


చేసే విధానం : నిటారుగా స్థిరంగా నిలబడాలి. కుడి కాలిని ఎడమ తొడ మీదికి రానివ్వాలి. ఇదే సమయంలో ఎడమ మోకాలిని కొద్దిగా వంచాలి. ఇప్పుడు ఎడమ తొడ మీది నుండి చుట్టిన కుడికాలి వేళ్ళు ఎడమ పిక్కపై వుంచాలి. తర్వాత ఎడమ చేయి కింద ఉండేలా రెండు చేతులను మెలిపెట్టి చిత్రంలో చూపిన విధంగా నమస్కార ముద్రలో ఉంచాలి. ఈ చేతులను ముఖానికి కాస్త పక్కగా ఉంచాలి. స్థిరంగా నిలబడటానికి దృష్టిని ఏదైనా బిందువుపై కేంద్రీకరించాలి. ఇలా పది నుండి ముప్పై సెకన్ల వరకు ఉండి తర్వాత యధాస్థితికి వచ్చి మరో కాలు చేతితో ఇలానే చేయాలి. ప్రతిరోజూ మూడుసార్లు సాధన చేయాలి.
ఉపయోగాలు : 1. మనసు స్థిరంగా ఉండటానికి, ఏకాగ్రతకు ఉపయోగపడుతుంది. 2. చేతులు, భుజాలు, కాళ్ళ కండరాలు, నరాలు, కీళ్ళు శక్తివంతంగా, సరళంగా మారుతాయి. 3. రుమాటిజం, హైడ్రోసిల్‌, సయాటికాను అరికడుతుంది. 4. కీళ్ళ నొప్పులు, ఒళ్ళు నొప్పులు రాకుండా చేస్తుంది. సాధారణ కీళ్ళ నొప్పులు తగ్గే అవకాశం ఉంది.

బద్ద పద్మాసనం: పద్మాసనంలో కూర్చొని కాళ్ళు, చేతులతో శరీరాన్ని బంధింపబడి ఉండటం బద్ద పద్మాసనం. హైబిపి, మోకాళ్ళ సమస్యలు, హార్ట్‌ ప్రాబ్లమ్స్‌ ఉంటే ఈ ఆసనానికి దూరంగా ఉండాలి.
చేసే విధానం: మొదట పద్మాసనంలో కూర్చోవాలి. తర్వాత రెండు చేతులను వెనక్కి పోనిచ్చి కుడిచేత్తో కుడి బొటన వేలిని, ఎడమ చేత్తో ఎడమ బొటన వేలిని పట్టుకోవాలి. వెన్ను నిటారుగా ఉండాలి. సాధారణ శ్వాసతో వీలైనంత సేపు ఉండాలి. మొదట్లో ఇది కొంత కష్టంతో కూడుకున్నా సాధన చేస్తుంటే అలవడుతుంది.

ఉపయోగాలు: 1. వెన్ను, ఊపిరితిత్తులు, కాలేయానికి ఎంతో లాభం. 2. ఛాతి వికసిస్తుంది. మోకాళ్ళు, చేతులు, పొట్ట, నడుము వద్దవున్న కొవ్వు కరుగుతుంది. నడుము సన్నబడుతుంది. మంచి ఆకృతి లభిస్తుంది. 3. చేతులు, భుజాలు, మోకాళ్ళు, వేళ్ళు బలంగా తయారవుతాయి. కీళ్ళ నొప్పులు రాకుండా చేస్తుంది. 4. పిల్లల్లో ఏకాగ్రత పెరుగుతుంది. సోమరితనాన్ని అరికడుతుంది. 5. అజీర్తి, నడుమునొప్పులు, మలబద్దకాన్ని నివారిస్తుంది. 6. వీపు నిటారవుతుంది. వెన్ను బలంగా వుంటుంది. గూని తగ్గుతుంది.
సంతులాసనం: ఒంటి కాలి మీద శరీరాన్ని బ్యాలెన్సింగ్‌గా (సంతులనంగా) ఉంచే ఆసనం ఇది. దీన్ని కూడా మోకాళ్ళ నొప్పి ఉంటే చేయొద్దు.

చేసే విధానం: రెండు కాళ్ళను దగ్గరగా చేసి స్థిరంగా నిలబడాలి. ఇప్పుడు కుడి కాలిని మడిచి పాదాన్ని చేత్తో పట్టుకోవాలి. ఎడమ చేతిని పైకి లేపాలి. ఈ చేయి తల దగ్గరగా ఉండాలి. వీలైనంత సేపు ఇలా వుండి యధాస్థితికి రావాలి. మరోవైపు ఇలానే చేయాలి. మొత్తం మూడుసార్లు రెండు వైపుల చేయాలి.
ఉపయోగాలు: 1. కీళ్ళకు బాగా వ్యాయామమవుతుంది. సాధారణ కీళ్ళ నొప్పులు, కండరాల నొప్పులు తగ్గుతాయి. 2. మోకాళ్ళు, మోచేతులు, చీలమండలం, వేళ్ళు, పాదాలకు మంచి ఆసనం. 3. శరీరంలో రక్త ప్రసరణ మెరుగవుతుంది.
ధన్యవాదములు 
మీ నవీన్ నడిమింటి 
విశాఖపట్నం 
9703706660

*సభ్యులకు విజ్ఞప్తి*
******************
ఈ గ్రూపులో పెడుతున్న మెసేజ్ లన్నీ సభ్యులలో ఆరోగ్యం పట్ల ప్రాధమిక అవగాహన కోసమే అని గమనించాలి. వివిధ జబ్బులగురించి నివారణలు సూచనలు కూడా సభ్యులలో అవగాహన పెంచడానికి మాత్రమే ..మీ డాక్టరు కి ఇది ప్రత్యామ్నాయము కాదు. సభ్యులు గమనించాలి.